Fréttabréf Giljaskóla
1. maí 2024
Kæra skólasamfélag
Vorið kom heldur hægt í ár að okkar mati en innan veggja skólans eru vorverkin hins vegar að verða allsráðandi. Undirbúningur næsta skólaárs mjakast áfram, stundatöflugerð og uppröðun í kennsluteymi er í fullum gangi.
Gert er ráð fyrir að stundaskrá skólans næsta vetur verði með svipuðu sniði og verið hefur í vetur. Stóra verkefnið okkar í Giljaskóla þetta vorið er að stækka sérdeild en hún er komin að þolmörkum og við bregðumst við því. Því verður stærri sérdeild sem tekur til starfa frá og með næsta hausti.
Annars er allt gott að frétta úr skólanum, dagskráin í maí inniheldur fasta liði eins og venjulega s.s útskriftarferð 10. bekkjar, frjálsíþróttamót miðstigsnemenda og aukin útivera.
Vorþemadagurinn er á sínum stað sem nemendur og starfsfólk nýta til útiveru og leikja. Við erum búin að vinna mikið í innramati í vetur til að gera góðan skóla enn betri og munum næsta vetur leggja áherslu á teymisvinnu og teymiskennslu, leiðsagnarnám auk þess sem við ætlum að vinna að markvissari ritunar samfellu í námi nemenda allt nemendum okkar til heilla. Við erum stór huga og bjartsýn fyrir komandi mánuði sem við vonum að hægt verði að nýta til aukinnar útikennslu í góðu veðri.
Bestu kveðjur
Alla, Ragna og Thelma
Giljarinn 2024
Miðvikudaginn 24. apríl var haldin verðlaunahátíð stuttmyndadaga vetrarins þar sem keppst er um hinn eftirsótta verðlaunagrip Giljarann. Fyrr í vetur gerði unglingastig stuttmyndir eftir frumsömdum handritum. Myndirnar voru sýndar á stuttmyndakvöldi þar sem öllum nemendum og fjölskyldum var boðið að koma og skemmta sér yfir afrakstrinum. Einnig gátu gestir það kvöld kosið um margvísleg verðlaun fyrir framleiðslu myndanna.
Meðal sigurvegara voru Guðný Björg í 8. bekk fyrir leik sinn í hlutverki Dusönku matráðar í myndinni ,,Brjóta Illt " og Hreggviður í 9. bekk fyrir leik sinn sem Sigfús kennari í myndinni ,,Allra allra síðasta veiðiferðin". Sigursælasta mynd kvöldsins sem jafnframt var valin besta myndin og hlaut Giljarann var myndin ,,Allra allra seinasta veiðiferðin" eftir handriti og í leikstjórn þeirra Kolfinnu, Bergrósar og Örnu í 10. bekk. Við óskum þeim, öðrum sigurvegurum sem og nemendunum öllum til hamingju með vandaða og bráðskemmtilega stuttmyndagerð.
Ganga vel frá hjólum og hlaupahjólum og notum hjálm
Það er vor í lofti margir nemendur koma á hjóli í skólann sem er mjög jákvætt. Við hvetjum alla til að hafa lása á hjólunum sínum og ganga vel frá þeim fyrir utan skólann þegar þau mæta. Mikilvægt er að allir taki umræðuna heima um mikilvægi þess að nota alltaf hjálm hvort sem verið er á rafhjólum, hlaupahjólum eða reiðhjólum og hvort sem vegalengdir eru stuttar eða lengri.
Kiwanis og Eimskip gefa nemendum í 1.bekk hjólahjálma og koma þeir í skólann 2. maí með þá.
Útivistartími breytist í maí
Útivistartími barna og unglinga tekur breytingum 1. maí. Frá þeim tíma mega 12 ára börn og yngri vera úti til klukkan 22.00. 13 til 16 ára unglingar mega vera úti til klukkan 24.00. Börn mega ekki vera á almannafæri utan fyrrgreinds tíma nema í fylgd með fullorðnum. Bregða má út af reglunum fyrir síðartalda hópinn þegar unglingar eru á heimleið frá viðurkenndri skóla-, íþrótta- eða æskulýðssamkomu. Aldur miðast við fæðingarár. Foreldrum/forráðamönnum er að sjálfsögðu heimilt að stytta þennan tíma og setja börnum sínum reglur um styttri útivistartíma.
Útivistarreglurnar eru samkvæmt barnaverndarlögum. Þeim er m.a. ætlað að tryggja nægan svefn en hann er börnum og unglingum nauðsynlegur. Svefnþörfin er einstaklingsbundin en þó má ætla að börn og unglingar á grunnskólaaldri þurfi 10 tíma svefn á nóttu.
Mikilvægt er að fylgja því eftir að börn og unglingar fái nægan svefn. Í því felst m.a. að ganga úr skugga um að þau séu ekki í tölvunni þegar þau eiga að vera komin í rúmið
Farsæld barna
Á Íslandi hafa ný lög um samþætta þjónustu í þágu farsældar barna tekið gildi. Að því tilefni hefur verið opnaður vefurinn Farsæld barna þar sem má finna upplýsingar um hvað lögin fela í sér og hér má sjá hér stutt myndband um það.
Meginmarkmið laganna er að búa til umgjörð sem stuðlar að því að börn og foreldrar sem á þurfa að halda hafi aðgang að samþættri þjónustu við hæfi án hindrana. Samþætt þjónustu í þágu farsældar barns er skipulögð og samfelld og hefur það markmið að skapa heildarsýn og ramma um þau þjónustukerfi sem skipta mestu máli fyrir farsæld barna.
Foreldrar og börn geta alltaf leitað sjálf til tengiliðar í nærumhverfi barnsins og óskað eftir samþættri þjónustu. Það er hægt að senda beiðni um tengilið í gegnum Þjónustugátt Akureyrarbæjar
Bókagjöf
Hrund Hlöðversdóttir rithöfundur færði skólanum veglega bókargjöf í samstarfi við bókarútgáfuna Hóla. Þetta eru bækurnar ÓGN-ráðgátan um Dísar Svan og ÓRÓi - krunk hrafnanna. Hún gaf skólanum 22. eintök af hvorri bók.
Við þökkum þeim kærlega fyrir okkur og hvetjum nemendur okkar til að nýta sér bækurnar.
Lalli töframaður heimsótti 6. -9.bekkur
Lalli töframaður kom í Giljaskóla miðvikudaginn 17. apríl og var með sýninguna Snjallvagninn fyrir nemendur í 6. - 9. bekk þar sem blandað var saman netöryggi og töfrum. Þetta var áhugaverð fræðsla þar sem farið var yfir netöyrggi með nemendum og vekja þá til umhugsunar um hegðun sína og líðan á netinu. Lalli töframaður náði vel til nemenda með fræðslu, töfrum og gríni og fór yfir stafrænt fótspor, persónuvernd, réttindi og ábyrgð á netinu og o. fl. mikilvæg málefni.
Fyrir fræðsluna fengu nemendur senda könnun þar sem markmiðið var að kanna stöðu barna, miðlanotkun og stafræna hæfni þeirra. Engum persónulegum upplýsingum var safnað í könnunninni en nemendur fengu gagnlegar upplýsingar um hegðun sína á netinu.
Skólaslit 4.júní 2024
Hér fyrir neðan er skipulag skólaslitadags:
• Kl. 09:00 mæta nemendur 1. -9.bekkjar og sérdeild í íþróttasal skólans og fara síðan inn í sínar bekkjarstofur.
Foreldrar og eða forráðamenn eru velkomnir á skólaslit.
• Frístund er lokuð á skólaslitadaginn.
• Útskrift 10.bekkjar fer fram á sal skólans kl. 15:00 – að henni lokinni er kaffihlaðborð fyrir 10.bekk og aðstandendur auk starfsfólks í boði útskriftarnema.
Á döfinni
1. maí - Verkalýðsdagurinn
6. maí - 6. bekkur heimsækir Hælið á Kristnesi
8. maí - Fiðringur í HOFI kl: 20:00
9. maí - Uppstigningadagur
14. - 16. maí skólaferðalag hjá 10. bekk
20. maí - Annar í hvítasunnu
21. maí - Starfsdagur
3. júní - Vordagur
4. júní skólaslit
Matseðill fyrir maí
Hér má sjá matseðil fyrir maí mánuð.