Áætlun gegn einelti

Starfsfólk Giljaskóla lýsir því yfir að hvorki einelti né annað ofbeldi er liðið í skólanum. Leitað er allra leiða til að fyrirbyggja einelti og áhersla lögð á að leysa þau mál sem upp koma á farsælan hátt. Giljaskóli á að vera öruggur vinnustaður þar sem starfið mótast af umhyggju, ábyrgð og lífsgleði. Stefnt að því að nemendur læri að setja sig í spor annarra, sýna umburðarlyndi og bera virðingu fyrir öðrum.

Einelti er endurtekið ofbeldi, líkamlegt eða andlegt, þar sem einn eða fleiri níðast á öðrum, sem á erfitt með að verjast. Einelti getur birst í ýmsum myndum þótt algengast sé að flokka það í tvo flokka, andlegt og líkamlegt.

Einelti getur verið

• Líkamlegt: barsmíðar, spörk, hrindingar eða skemmdarverk 
• Munnlegt: uppnefni, niðrandi athugasemdir og endurtekin stríðni 
• Skriflegt: tölvuskeyti, sms–skilaboð, bloggsíðuskrif, krot og bréfasendingar 
• Óbeint: baktal, útskúfun eða útilokun úr félagahópi
• Efnislegt: eigum barnsins stolið eða þær eyðilagðar
• Andlegt: þegar barnið er þvingað til að gera eitthvað sem stríðir algjörlega gegn réttlætiskennd þess og sjálfsvirðingu.

Einelti er ofbeldi sem getur haft alvarlegar afleiðingar í för með sér bæði fyrir þolanda og geranda. Andlegt ofbeldi, eða áreiti, hefur oft verri afleiðingar í för með sér en líkamlegt. Einelti hefur iðulega alvarleg áhrif á nám, líðan og félagsþroska einstaklinga.

Aðgerðateymi hefur umsjón með og sinnir faglegri forystu í eineltismálum innan skólans og veitir kennurum, nemendum og foreldrum leiðsögn. Í aðgerðateymi eru: Skólastjóri, aðstoðarskólastjóri, deildarstjóri og námsráðgjafi. Ef grunur um einelti vaknar er unnið eftir eineltisáætlun Giljaskóla.

Mikilvægt er að börn séu alin upp við jákvæða athygli. Sjálfsöruggt barn er síður líklegt til að vera lagt í einelti og er betur í stakk búið til að takast á við stríðni og einelti. Forvarnir og almennar fyrirbyggjandi aðgerðir í Giljaskóla snúa m.a. að:

• Áhersla á jákvæðan, lýðræðislegan skólabrag
• Vinna með áherslur í sýn skólans og leitast við að láta þær einkenna vinnubrögð og viðmót starfsmanna
• Öflugt samstarf heimila og skóla frá byrjun skólagöngu
• Reglulegir bekkjarfundir þar sem rætt er um samskipti innan hópsins og við aðra 
• Fræðsla um einelti fyrir nemendur, foreldra og starfsfólk 
• Opin umræða um einelti í bekkjardeildum, t.d. með lestri á sögum og umræðum um einelti, hegðun, samskipti og líðan 
• Árlegar tengslakannanir og úrvinnsla þeirra
• Aðstoðarmenn úr hópi bekkjarfélaga fyrir nýja nemendur 2. – 10. bekkjar 
• Gott samstarf vinabekkja þar sem eldri nemendur eru hvattir til að gæta þeirra yngri
• Skipulagðir leikir og leikjastöðvar í frímínútum 
• Virk gæsla í vinnuhléum, á göngum, í matsal, á útisvæði og í íþróttahúsi. 
• Skipulag kennslu taki mið af þjálfun nemenda í samvinnu og samstarfi. 
• Áhersla á góða bekkjarstjórnun, reglusemi og öguð vinnubrögð 
• Skilvirkt upplýsingaflæði 
• Regluleg endurskoðun eineltisáætlunar Giljaskóla.