Stóra upplestrarkeppnin 2011

Lokahátíð Stóru upplestrarkeppninnar 2011 var haldin á sal Menntaskólans, Hólum miðvikudaginn 23. mars síðastliðinn.  Fyrirkomulag Stóru upplestrarkeppninnar er þannig að haldnar eru undankeppnir í hverjum skóla fyrir sig þar sem fulltrúar skólans eru valdir. Raddir, samtök um vandaðan upplestur og framsögn standa fyrir þessari keppni ásamt skóladeild. Keppnin var haldin í sal Menntaskólans að viðstöddu fjölmenni. Þarna voru mættir til leiks fulltrúar 7. bekkinga úr öllum grunnskólunum á Akureyri. Keppendur voru 17 í ár og stóðu sig allir með miklum sóma. Það var sérlega ánægjulegt að sjá hvað nemendur voru yfirvegaðir og skemmtilegt að fylgjast með þessum frábæra hópi nemenda lesa upp fyrir fullum sal af fólki og standa sig svo vel sem raun var. Sigurvegarar þetta árið voru: Urður Andradóttir úr Lundarskóla sem varð í þriðja sæti, Kristrún Jóhannesdóttir nemandi í Síðuskóla varð í öðru sæti og sigurvegari árið 2011 varð Fannar Már Jóhannsson nemandi í Lundarskóla. Ólafur B. Thoroddsen skólastjóri Síðuskóla tók nokkrar myndir af keppninni og má sjá þær hér.  Jón Baldvin Hannesson skólastjóri Giljaskóla tók einnig myndir og má sjá þær hér. Styrktaraðilar keppninnar voru Mjólkursamsalan, Kexverksmiðjan og Blómabúð Akureyrar.

Byr sparisjóður veitti vegleg peningaverðlaun.