Fréttir

Í dag, 3. okt., hófst hin æsispennandi og hrollvekjandi framhaldssaga Dauð viðvörun eftir Ævar Þór Benediktsson á síðunni https://www.skolaslit.is/ Athugið að sagan hentar ekki viðkvæmum sálum né ungum börnum. Hún er talin henta best fyrir mið- og unglingastig. Nýr kafli kemur inn hvern virkan dag í október. Hægt að lesa og hlusta undir flipanum sagan á vefsíðunni. Bókin með sögunni síðan í fyrra er komin út og mætt á safnið! Góða skemmtun!

Posi á staðnum

Í dag, miðvikudaginn 28. september, tóku nemendur Giljaskóla þátt í Ólympíuhlaupi ÍSÍ en hlaupið hefur verið árlegur viðburður hjá okkur undanfarin ár. Með Ólympíuhlaupi ÍSÍ er leitast við að hvetja nemendur skóla til þess að hreyfa sig reglulega og stuðla þannig að betri heilsu og vellíðan. Það var stemning í nemendum og starfsfólki, enda veðrið gott og úrvals tónlist í græjunum. Eftir hlaupið var nemendum boðið að gæða sér á ávöxtum. Okkur reiknast til að nemendur Giljaskóla hafi hlaupið samtals um 1260 km. í dag. Glæsilegur árangur það!

Síðustu þrjá daga hafa staðið yfir skemmtilegir og lærdómsríkir þemadagar í 1. - 7. bekk. Ákveðið var að taka sjálfbærniþemað sem stendur nú yfir enn lengra og flétta við vísindi og sköpun. Nemendur unnu í aldursblönduðum hópum á ólíkum stöðvum, þar sem þeir m.a. lærðu um endurnýtingu og neyslu. Svo fengu allir nemendahópar þá áskorun að brjótast út úr "Break out herbergi" með því að leysa þrautir sem tengjast viðfangsefninu. Nemendur útbjuggu mylluspil úr steinum, veggteppi um sjálfbærni og stóra mandölu á vegg til að setja í jógarýmið. Einnig mátti sjá nemendur gera stuttmyndir um sjálfbærni og fara í spennandi vísindaverkefni með heimatilbúnum eldflaugum og bílum. Nemendur virtust njóta sín vel í námi og leik undanfarna daga og vonandi sjáum við árangur í aukinni umhverfisvitund í framhaldinu.

Fimmtudaginn 22. september var allt starfsfôlk Kiðagils og Giljaskóla hvatt til að ferðast til og frá vinnu með umhverfisvænum hætti í tilefni af bíllausa deginum. Flest starfsfólk tók áskoruninni fagnandi og skildi bílinn eftir heima. Nemendur 6. bekkjar gáfu því starfsfólki heilsudrykk og hrósmiða að launum.

Í morgun drógu nokkrir nemendur regnbogafánann að húni hér við Giljaskóla. Regnbogafáninn er táknrænt merki þess að við fögnum fjölbreytileikanum og viðurkennum ólíka einstaklinga. Á vefsíðu hinsegindaga segir: Frá því að regnbogafáninn varð að tákni í baráttu hinsegin fólks hafa margir aðrir gert fánann að tákni sínu. Gilbert Baker, hönnuður fánans, hefur sagt í fjölda fyrirlestra að fáninn sé eign allra sem berjist fyrir mannréttindum hvar sem er í heiminum.

Skólaslit 1. - 9. bekkjar og sérdeildar: Nemendur mæta í íþróttasal Giljaskóla kl. 9:00 en fara síðan í stofur til að kveðja samnemendur og umsjónarkennara. Foreldrar / forráðamenn eru velkomnir. Útskrift 10. bekkjar: Útskrift 10. bekkjar verður í íþróttasalnum kl. 16:00.

Að undanförnu hafa nemendur 5. bekkjar verið í spennandi verkefni þar sem þau samþætta nám í stærðfræði, sköpun, náttúrufræði og grenndarnámi. Krakkarnir byrjuðu á að fá fyrirmæli um hvernig hyrning þau áttu að gera. Þau teiknuðu hann á blað og mældu ummál og flatarmál. Þau fengu síðan að vita hversu djúpt steypumótið átti að vera og þá gátu þau reiknað rúmmálið. Nemendur útbjuggu síðasn steypumót. Þeir steyptu síðan hellur, skreyttu þær og gerðu eldstæði í skógarrjóðrinu okkar. Samhliða þessu var unnið með náttúrufræði, nemendur hlustuðu á stutt podcast um hvaða dýr lifa í skóginum. Krakkarnir gerðu svo allskonar hús fyrir dýrin í rjóðrinu. Vinnunni lauk með því að leira dýr og skrifa um þau sögu. Við hvetjum nemendur til að bjóða foreldrum með sér í göngutúr í rjóðrið til að skoða afraksturinn!