Fréttir

Í morgun áttum við góða stund, þar sem nemendur úr 7. bekk tóku þátt í forkeppni Giljaskóla fyrir Stóru upplestrarkeppnina. Nemendur lásu textabrot úr bókinni Ys og þys út af öllu eftir Hjalta Halldórsson og ljóð úr nýjustu ljóðabók Þórarins Eldjárns, Fuglaþrugl og naflakrafl. Við mat á lestri er horft til ýmissa þátta, svo sem framburðar, raddstyrks, blæbrigða í lestri og hve nemendum tekst vel að túlka textann. Að lokum valdi dómnefndin þær Kolfinnu Stefánsdóttur og Matthildi Ingimarsdóttur sem fulltrúa Giljaskóla í lokakeppninni og Tinna Dís Axelsdóttir verður varamaður þeirra. Lokakeppnin mun fara fram í Kvosinni í Menntaskólanum á Akureyri þann 10. mars næstkomandi.

Eins og allir vita er Giljaskóli heilsueflandi grunnskóli. Megintilgangur þess er að vinna að því að nemendur og starfsfólk skólans skapi sér heilbrigðan lífsstíl til frambúðar. Verkefnið felst í hvatningu og leiðbeiningum en ekki boðum og bönnum. Á síðasta ári tóku bæði starfsfólk og nemendur skólans þátt í Lífshlaupinu, sem er heilsu- og hvatningarverkefni Íþrótta- og Ólympíusambands Íslands sem höfðar til allra aldurshópa. Lífshlaupið gengur í meginatriðum út á það að hvetja fólk til aukinnar hreyfingar í daglegu lífi. Við höfum skráð okkur til leiks á ný og hefst gamanið í dag, miðvikudaginn 3. febrúar. Öll miðlungserfið og erfið hreyfing telur en nemendur þurfa að ná samtals a.m.k. 60 mínútna hreyfingu á dag (má vera í nokkrum áföngum yfir daginn). Grunnskólakeppnin (keppni nemenda) stendur í tvær vikur en vinnustaðakeppnin í þrjár. Við biðjum ykkur foreldra og forráðamenn að taka virkan þátt í þessu með okkur og hvetja börnin til hreyfingar, hreyfa ykkur með þeim og aðstoða þau við skráningu.

Giljaskóli hefur að undanförnu lagt aukna áherslu á menntun í upplýsingatækni og það að nýta möguleika tæknilegra lausna til að auka gæði náms nemenda skólans. Í vor hlaut skólinn styrk frá forriturum framtíðarinnar til kaupa á ýmsum tækjum til forritunar- og tæknikennslu, en meginhlutverk sjóðsins er að efla forritunar- og tæknimenntun í grunn- og framhaldsskólum landsins. Giljaskóli hlaut 200.000 króna styrk og þakkar Forriturum framtíðarinnar innilega fyrir veittan stuðning. Styrkurinn var nýttur til kaupa á Lego WeDo 2.0 en þar fá nemendur tækifæri til að læra undirstöðuna í forritun og ýmislegt um vélbúnað. Nemendur byggja og forrita auðveldar vélar, sem tengjast við tölvu. Einnig voru keyptir drónar, sem taka myndir og myndbönd og Osmo forritunarleikurinn Detective Agency.

Kæra skólasamfélag Giljaskóla Við sendum okkar bestu nýjárskveðjur og hlökkum til samstarfsins á nýju ári! Þann 21. desember kom út ný reglugerð um skólahald og í henni segir að hefja megi skólastarf í grunnskólum samkvæmt stundaskrá eftir áramótin. Við munum hefja skólann þann 5. janúar samkvæmt stundaskrá, allir mæta kl. 8.10 og ganga inn um sinn venjulega inngang. Stefnt er að því að valgreinar á unglingastigi byrji 11. jan. Þann 4. janúar er skipulagsdagur. Við vonum svo sannarlega að nýtt ár 2021 færi okkur okkur öllum gæfu og gleði!

Foreldrafélag Giljaskóla gaf skólanum nýlega styrk til að kaupa búnað fyrir hlaðvarpsgerð nemenda (podcast). Styrkurinn var nýttur í að kaupa þann búnað sem til þurfti og hefur þetta vakið mikla lukku. Bæði kennarar og nemendur hafa verið duglegir að nýta sér aðstöðuna til að taka upp hlaðvörp til að nýta í kennslu og til að skila verkefnum. Við erum foreldrafélaginu afar þakklát fyrir þetta frábæra framtak. Það er nauðsynlegt að nemendur hafi aðgang að fjölbreyttum aðferðum til að miðla efni og þjálfist í að koma fram. Að hafa aðgang að hljóðveri gerir okkur kleift að nýta fleiri miðla við verkefnaskil og í framtíðinni sjáum við fyrir okkur að nýta þetta til að gera kennsluefnið aðgengilegra fyrir nemendur, öllum til hagsbóta.

Foreldrafélag Giljaskóla gaf á dögunum skólanum styrk til að kaupa búnað fyrir hlaðvarpsgerð nemenda (podcast). Styrkurinn var nýttur í að kaupa þann búnað sem til þurfti og hefur þetta vakið mikla lukku. Bæði kennarar og nemendur hafa verið duglegir að nýta sér aðstöðuna til að taka upp hlaðvörp til að nýta í kennslu og til að skila verkefnum og erum við afskaplega þakklát fyrir þetta frábæra framtak. Það er nauðsynlegt að nemendur hafi aðgang að fjölbreyttum aðferðum til að miðla efni til annara og þjálfist í að koma fram. Að hafa aðgang að hljóðveri gerir okkur kleift að nýta fleiri miðla við verkefnaskil og í framtíðinni sjáum við fyrir okkur að nýta þetta til að gera kennsluefnið aðgengilegra fyrir nemendur, öllum til hagsbóta.