Fréttir

Alþjóðadagur móðurmálsins er haldinn hátíðlegur á hverju ári þann 21. febrúar að tilstuðlan Menningarmálastofnunar Sameinuðu þjóðanna, UNESCO. Til að vekja athygli á fjölda þeirra tungumála sem töluð eru í skólum Akureyrarbæjar hafa þeir sem eru með íslensku sem annað mál í leik- og grunnskólum bæjarins verið að skrifa orðin ást og friður á sínu móðurmáli. Við í Giljaskóla höfum sett þessi orð á blað á 13 tungumálum sem töluð eru í skólanum okkur. Aðrir leik- og grunnskólar bæjarins gera slíkt hið sama og afraksturinn má sjá í gluggum kaffihúss Amtsbókasafnsins næstu daga.

Fimmtudaginn 9. febrúar er opið hús fyrir foreldra /forráðamenn nemenda sem hefja skólagöngu í 1. bekk næsta haust frá klukkan 9:00 – 10:00. Kynningin fer fram í Frístund.

Alís Helga Daðadóttir er nemandi í 10.bekk hér í Giljaskóla. Hún hefur frá árinu 2015 æft snjóbretti með Brettafélagi SKA með frábærum árangri. Það er greinilegt að þessar æfingar hafa borgað sig því núna í janúar er Alís að fara á Ólympíuleika ungmenna (youth Olympics) á Ítalíu að keppa. Hér er stutt viðtal við Alis um ferðina og snjóbrettin.

Starfsfólk Giljaskóla óskar nemendum, foreldrum og öðrum velunnurum skólans gleðilegra jóla og farsældar á nýju ári. Þökkum gott samstarf á árinu sem er að líða. Skólahald hefst aftur samkvæmt stundaskrá miðvikudaginn 4. janúar.

Á miðstigi í Giljaskóla hafa nemendur unnið tvö stór þemaverkefni sem tengjast grunnþáttum menntunar skv. Aðalnámskrá grunnskóla í vetur og hafa þessi verkefni komið í stað hinnar hefðbundnu kennslu. Stundaskráin hefur verið opnuð mikið og ekki settar niður námsgreinar í ákveðna tíma heldur stýra verkefnin sem unnin eru hverju sinni stundaskránni. Síðustu vikurnar hafa nemendur unnið verkefni sem tengjast lýðræði og mannréttindum og hét þemað Betri heimabyggð. Nemendur unnu í mismunandi pörum í verkefnum sem samþætta íslensku, ensku, stærðfræði, náttúrufræði og samfélagsfræði.

Elías Gunnar Þorbjörnsson hefur verið ráðinn skólastjóri við Giljaskóla og tekur til starfa þar 1. febrúar 2023. Elías er menntaður grunnskólakennari og með meistarapróf í stjórnun menntastofnana. Hann hefur verið skólastjóri við Lundarskóla síðastliðin 10 ár. Við bjóðum Elías Gunnar velkominn í Giljaskóla. Vala Stefánsdóttir verður starfandi skólastjóri þar til Elías tekur við.