Fréttir

Nemendur 5. bekkjar í Giljaskóla söfnuðu í dag birkifræjum í tengslum við landsátak í söfnun og sáningu birkifræs sem hófst haustið 2020. Íslensk stjórnvöld stefna að því að stækka birkiskóga landsins, en markmið Íslands er að árið 2030 vaxi birkiskógar á 5% landsins en í dag vaxa birkiskógar aðeins á 1,5% landsins. Það að taka þátt í verkefninu gefur unga fólkinu okkar færi á að leggja sitt af mörkum til landbótastarfs og stuðlar að auknum skilningi á mikilvægi landbótastarfs í baráttunni gegn loftslagsbreytingum. Upplýsingar um verkefnið er að finna á vefsíðunni www.birkiskogur.is

Guðríður Sveinsdóttir, kennari við Giljaskóla, hefur verið tilnefnd til íslensku menntaverðlaunanna í flokknum framúrskarandi kennari. Það er mikill heiður fyrir kennara að fá slíka tilnefningu og við getum svo sannarlega verið stolt af Guðríði og vitum að viðurkenningin er verðskulduð. Afhending verðlaunanna fer fram á Bessastöðum miðvikudaginn 2. nóvember.

Í dag, 3. okt., hófst hin æsispennandi og hrollvekjandi framhaldssaga Dauð viðvörun eftir Ævar Þór Benediktsson á síðunni https://www.skolaslit.is/ Athugið að sagan hentar ekki viðkvæmum sálum né ungum börnum. Hún er talin henta best fyrir mið- og unglingastig. Nýr kafli kemur inn hvern virkan dag í október. Hægt að lesa og hlusta undir flipanum sagan á vefsíðunni. Bókin með sögunni síðan í fyrra er komin út og mætt á safnið! Góða skemmtun!

Posi á staðnum

Í dag, miðvikudaginn 28. september, tóku nemendur Giljaskóla þátt í Ólympíuhlaupi ÍSÍ en hlaupið hefur verið árlegur viðburður hjá okkur undanfarin ár. Með Ólympíuhlaupi ÍSÍ er leitast við að hvetja nemendur skóla til þess að hreyfa sig reglulega og stuðla þannig að betri heilsu og vellíðan. Það var stemning í nemendum og starfsfólki, enda veðrið gott og úrvals tónlist í græjunum. Eftir hlaupið var nemendum boðið að gæða sér á ávöxtum. Okkur reiknast til að nemendur Giljaskóla hafi hlaupið samtals um 1260 km. í dag. Glæsilegur árangur það!

Síðustu þrjá daga hafa staðið yfir skemmtilegir og lærdómsríkir þemadagar í 1. - 7. bekk. Ákveðið var að taka sjálfbærniþemað sem stendur nú yfir enn lengra og flétta við vísindi og sköpun. Nemendur unnu í aldursblönduðum hópum á ólíkum stöðvum, þar sem þeir m.a. lærðu um endurnýtingu og neyslu. Svo fengu allir nemendahópar þá áskorun að brjótast út úr "Break out herbergi" með því að leysa þrautir sem tengjast viðfangsefninu. Nemendur útbjuggu mylluspil úr steinum, veggteppi um sjálfbærni og stóra mandölu á vegg til að setja í jógarýmið. Einnig mátti sjá nemendur gera stuttmyndir um sjálfbærni og fara í spennandi vísindaverkefni með heimatilbúnum eldflaugum og bílum. Nemendur virtust njóta sín vel í námi og leik undanfarna daga og vonandi sjáum við árangur í aukinni umhverfisvitund í framhaldinu.

Fimmtudaginn 22. september var allt starfsfôlk Kiðagils og Giljaskóla hvatt til að ferðast til og frá vinnu með umhverfisvænum hætti í tilefni af bíllausa deginum. Flest starfsfólk tók áskoruninni fagnandi og skildi bílinn eftir heima. Nemendur 6. bekkjar gáfu því starfsfólki heilsudrykk og hrósmiða að launum.

Í morgun drógu nokkrir nemendur regnbogafánann að húni hér við Giljaskóla. Regnbogafáninn er táknrænt merki þess að við fögnum fjölbreytileikanum og viðurkennum ólíka einstaklinga. Á vefsíðu hinsegindaga segir: Frá því að regnbogafáninn varð að tákni í baráttu hinsegin fólks hafa margir aðrir gert fánann að tákni sínu. Gilbert Baker, hönnuður fánans, hefur sagt í fjölda fyrirlestra að fáninn sé eign allra sem berjist fyrir mannréttindum hvar sem er í heiminum.