Fréttir

Kolfinna Stefánsdóttir nemandi í 6. bekk var tilnefnd fyrir smásöguna "Jólasveinar í sumarfríi" á Sögum, verðalaunahátíð barnanna sem fram fór í Borgarleikhúsinu sl. laugardag 6. júní. Alls bárust um 100 sögur í keppnina og voru 20 tilnefndar af þeim. Allar sögurnar sem voru tilnefndar voru gefnar út á rafbókinni "Risastórar smásögur" á vegum Menntamálastofnunnar. Tengil á bókina má finna hér https://vefir.mms.is/flettibaekur/namsefni/risastorar_2020/ Og hér er svo ein mynd af henni með viðurkenningarskjalið sitt. Innilegar hamingjuóskir Kolfinna :)

Skólaslit verða með þeim hætti að 1. - 9. bekkur kemur saman í íþróttasal skólans kl. 10.00 föstudaginn 5. júní. Að því loknu fara nemendur með sínum umsjónarkennurum í stofur, fá námsmat og kveðja. Gengið er út frá því að skólaslitin taki um klukkustund. Vegna samkomutakmarkana þurfum við að hafa athöfnina að þessu sinni án foreldra.

Næstkomandi föstudag ætlum við að taka þátt í UNICEF hreyfingunni. Markmið UNICEF-hreyfingarinnar er að fræða börn um réttindin í Barnasáttmálanum og virkja þau til samstöðu með jafnöldrum sínum um allan heim. Þá munu nemendur skólans hlaupa/ganga stuttan hring í hverfinu. Hver og einn nemandi fær heimspassa og í hann safnar hann límmiðum fyrir hvern hring sem farinn er. Samhliða geta nemendur safnað áheitum frá fjölskyldu og ættingjum fyrir hvern hring sem þeir hlaupa/ganga. Nemendur fá allir upplýsingabréf um viðburðinn ásamt áheitaumslagi. Áheitin eru algjörlega valkvæð og munu allir nemendur taka þátt í að fara hringinn og fá viðurkenningu á hverjum förnum hring.

Við í Giljaskóla höfum verið að styrkja tvö börn í mörg ár. Eftir hverja söfnun hefur verið örlítill afgangur sem hefur safnast upp á reikning hjá okkur. Hugmyndir höfðu verið uppi um að styðja betur við ABC og nú kemur hann sér vel og ætlum við að nota hann til að leggja ABC lið með 50.000 króna framlagi til kaupa á matarpökkum handa fjölskyldum barna á vegum ABC sem eru verst stödd. Sá hópur sem verður hvað verst úti eru þeir sem búa við viðvarandi skort, þar á meðal eru fjölskyldur barna sem eru í skólum á vegum ABC barnahjálpar í Afríku og Asíu, en skólum hefur víðast hvar verið lokað. Hér er hægt er að lesa nánar um söfnun ABC vegna COVID 19.

Nú styttist í páskafrí hjá nemendum. Nauðsynlegt er að allir hafi nóg fyrir stafni á þessum sérkennilegu tímum og sinni fjölbreyttum og nærandi viðfangsefnum. Við í Giljaskóla höfum verið að vinna mikið með lestur og lesskilning í vetur og viljum við hvetja nemendur til að vera duglegir að lesa í páskafríinu. Einnig minnum við á mikilvægi foreldra og annarra fjölskyldumeðlima við að vera góðar fyrirmyndir í þessum efnum. Því er kjörið að fjölskyldur taki höndum saman, virki keppnisskapið og skrái sig til leiks í verkefnið Tími til að lesa. Hér má sjá myndband með Gunnari Helgasyni þar sem hann býður okkur landsmenn velkomin til þátttöku í verkefnið og hér er annað myndband þar sem Ævar vísindamaður mælir með góðri bók.